یه آیم ساده

یه آیم ساده،عقیده پاکم

نه دروزنم،نه حرصناکم

نه اهل حال ونه خایه مالم

کسیه نه قپان،وه ژیربالم

دسل له خیرواهل شادیم

طرفدارحق، اوآزادیم

نه ریاکارم ،نه دغل بازم

اهل سازشم ،وَلِت اسازم

صاف وصادقم،جورجامکم

نه اهل حمله،نه هم پاتکم

دم تقه نیرم،فره نازارم

مال وثروتم،له کس ناشارم

ثروتم مردم ،دل پاکمه

ولات دوسان،ملک وخاکمه

هم اهل ذوق وهم هنرمندم

بیخود بی جهت ،یه جا ناگردم

کول، پیه بردنه،چنه عزیزم

چنه شیک وپیک،چنه تمیزم

هم اهل شوخی ،هم اهل سازم

ول آیم اَخمو،هیوچ وخت ناسازم

اگرتومه دیت، خنه سازبکه

اگرصلاح دیت،اَرم نازبکه

مه اهل دلم،خداشناسم

یه بیه تکلف،یه پیا خاصم

حواست جم که، خوسه دارنووم

تاابدخمگین،مه بیزارنووم

یه وخت نشکنی،ایه دلِ پاکه

ایه اهلِ صفا،یه اهلِ خاکه

اَتیت تَکان ،عرشِ کردگار

روژنیمه رو،دیه دوکُت شه وار

مه اهل دلم،سخن سازاکم

یه شیو بیه خه ور،مه پروازاکم

مه پروازاکم ،تا عرش برین

وناله دریون،ناوم اچرین

هناس اکیشی ،ناله نال اکی

وخته دفن کردی،فکرمال اکی

تاابدهیوچ وخت،سیا پوشت نووم

اگرمه مردم،فراموشت نووم

فراموشت نووم ،له دونیایدرده

خاک گورمردم،سیاه وسرده

دل بسین نیره،ایه دونیا درده

هرکه دل اشکان،اومت نامرده

دل کسه نشکن،تاسبکبالیوت

تااهلِ دلیوت،تااهلِ خالیوت

مه اهل دل وخط وخال بیومه

جوریه پرنده، سبکبال بیومه

بهشت میلکانِ، خاص وخاصانه

جهنم میلکان، بنده شیطانه

مه احساس اکم ،خدا دوسمه

دیه هیوچ ناخوازم،پرِ پوسمه

ایسه گه گوش دای،مه قربانتم

دوس نازارم،پریشانتم

عذرخواهی کم،شکتت کردم

شایدله کاره،کمکت کردم

مه هامه هولت، خیوشک، براگم

اگرمه نیووم ،خالی نیل جاگم

خدانگه دار،دوسِ هم کیشم

تاروژِ تِرَگ،وه لات انیشم