دوره قدیم

یاران یاوران، دوسیل گیانی

هاکو به خواردایم، نانِ خوه مانی

نان خوه مانی، سبوس داره بیو

یه برته فئنگ چی، کاوسواره بیو

مردان جه نگ گی، پیالِ خاصیون

مردم باایمان، خداشناسیون

صدای زنگول و پس وپوله بیو

داس ودراووه و اِمجا هوله بیو

مردم بیه ریا ،بیه تکه لفیون

صاف وصادق واو زحمت کشیون

کس درونایا ،صدق وصفا بیو

دوره راسان ومردِخدا بیو

 مردمِ قدیم،  دس ودل بازیون

دوره گل وه نی ،دوه تیلِ نازیون

سیا چادربیو،مشک ومالاره

ژن وپیا کل، مشغوله کاره

شیوکیان شفق ،قیوله کله شیر

ناشتا اَخواردی، له طوف وپنیر

آ دوره کل چیشت، اصیل وخاصیو

حرفِ مرد سند،قیول دیا راسیو

شیونشینی بیو، هرشیو له ماله

هرکه مریض دیو،اَ پرسین حاله

کیوخا نقل اَ کرد ، گوش دیامنه ده ئنگه

کس نیم، بدحالِ،اودله ته ئنگه

کیوانو ده وت ،افسانو ومتل

قصیه شیرینیو،جورمنه عسل

هرچه مه بیوژم له باره کمه

دل وخته خوش نیو،مال اره چمه

توقع وکم کم ،خیله زیاد بیو

شادی زندانی، خوسه آزاد بیو

خوسه ومرض، بیوه دالمان

مِردن ناناسه، سن وسالمان

مرگ جوانیل، دامن گیربیوه

جوان پیری نی،ولی پیربیوه

دس روزگار،خوسه دارم کرد

خمیلِ دونیا ،فره بارم کرد

هاکوسرچوپی، هاکوسازدیول

هاکوکیوانو ،گل وه نی وه مل

هاکو تفنگ چی ،هاکوبهاران

هاکوهیک هاکِ خنه نازاران

سیاه چادر ومالارکی رمان

کی نهالِ خم، وه مُلکه چکان

له جی گل وه نی، ساپورت اَپوشیم

له جی دووه خَس ، کوکا اَنوشیم

نه کوکا دوه دیه، نه ساپورت شوال

 آساپورته ته ،برئنگه بیه گلال

نهات ریو چووه ،جوان گردگه

جوان بیه دهئنگه، خدا مردگه

کله بیکارومعتاد شیشه شن

کیه جورقدیمل، له حالِ کی شن

مالِم برمه، جوان معتاده

کیه جورقدیمل، خوه شال وشاده

مه دیه صبرنیرم ، له وضعیته

ملکی ساکت بوس مگرتوچته؟

زوان قرمزت، جورفلفل تنده

حساوکتاوت ،سرجمع ورنده

ملکی ساکت بوس، مگرهاربیوته

نیشدارگزنده،عینِ ماربیوته

له قدیم چته، له حال چه خوازی؟

وه چه براگم ،تودیوته راضی؟

وخته راضی دوم،شادی آزاده

مردم خندانون، ایران آباده

نه فقیربیونم نه پارتی بازی

دوس ورفیق نون،دزل و قاضی

نه زیرمیزی بیه، نه رشوه گیره

ملکی خوسه کل، بچه له بیره

ملکی وه خدا ،سخن شناسی

اهل حرف حق ،اوقصیه راسی

کی شاعرجورتو،له مُلکَ دیه؟

ایه ذوق وشعره ،بیوژ کارکیه؟

مه هنرمندم ،شعرم طلاسه

ایه ذوق وشعره،کارِ خداسه